Tuesday, September 23

#199: روح تانية

عايزة أقعد أكتب للصبح .. كلام كتير ورا بعضه ومالوش علاقة ببعض .. ماتفهمش منه حاجة بس تطلع منه بألف معنى ومعنى

عايزة أسهر على كتاب ومانامش لحد ما يخلص .. أو يقف بيا الزمن ومايرجعش إلا لما أخلص قراية كام كتاب كده

عايزة أجري كتير وأفضل أجري وأجري لحد ماتعب .. لأ لحد ما التعب يخلص .. لحد ما أبطل أحس بأي حاجة

عايزة أكل أكلة حلوة.. غريبة وجديدة ومشبعة .. تكون حادقة ومسكرة في نفس الوقت .. وما تتعبنيش وما تخنيش!

عايزة أفضل سهرانة طول الليل والصبح أروح شغلي وأنا فايقة ورايقة .. وأضحك وأهزر وأشتغل بجد

عايزة أضحك على الساعة وأقولها أنا سابقاكي بساعة.. بدل ما كل مرة أبصلها وألقيها بتجري بعيد عني

عايزة أحلم حلم حقيقي .. ولما أصحى أحكيه للناس كلها واستناه يجي تاني حلم أو حقيقة

عايزة أقابل ناس معرفهاش وأتكلم معاها بالساعات وأكتشف فعلا إني ما أعرفهمش .. ناس غريبة مش شبهي ولا حتى بأي طريقة

عايزة أقعد قدام البحر يوم بحاله .. 24 ساعة يعني .. أشوف الشمس وهي طلعة و أشوفها وهي نازلة وأشوفها وهي بتعاكسني كل ما أبصلها

عايزة أطلع فوق الجبل وألمس السما .. أو أنط من فوق وألمس الأرض بجد

عايزة حد يحكيلي قصة .. قصة ما تتصدقش .. بس أنا أصدقها بجد واتأثر بيها بجد وأدافع عنها لو أي حد شكك فيها كإنها قصتي أنا

عايزة الناس كلها تشوفني وأنا مغمضة عيني ومش فارق معايا حد

أنا عايزة أموت وأرجع أعيش من تاني .. بروح تانية .. أو بشكل تاني

No comments: